អបអរសាទរការបញ្ចប់ដោយជោគជ័យនូវពិធីជប់លៀងប្រចាំឆ្នាំរបស់ក្រុមហ៊ុនហ្គោលវែល ខាភីថល
- 2020-01-17
នៅល្ងាចថ្ងៃទី ១៧ ខែមករា ឆ្នាំ ២០២០ ពិធីជប់លៀងប្រចាំឆ្នាំរបស់ក្រុមហ៊ុនហ្គោលវែលត្រូវបានរៀបចំឡើងនៅសណ្ឋាគារសូហ្វីតែល ភូគីត្រា ភ្នំពេញ ដោយមានការអញ្ជើញចូលរួមពីសំណាក់ភ្ញៀវកិត្តិយសជាច្រើនមកពីទូទាំងពិភពលោក។
ពិធីជប់លៀងនេះ ជាឱកាសដ៏ល្អបំផុតសម្រាប់ការពិនិត្យមើលសមិទ្ធិផលឆ្នើមដែលបង្កើតដោយក្រុមហ៊ុននៅឆ្នាំ ២០១៩ និងជាការលើកទឹកចិត្តចំពោះលទ្ធផលការងារឆ្នើមរបស់បុគ្គលិកគ្រប់រូបផងដែរ។ នៅឆ្នាំ ២០១៩ ក្រុមហ៊ុនហ្គោលវែលទទួលបានសមិទ្ធិផលជាច្រើន ដែលក្នុងនោះអ្វីដែលគួរឲ្យកត់សម្គាល់បំផុតនោះគឺ ក្រុមហ៊ុនហ្គោលវែលបានបញ្ចប់ Roadshow តាមបណ្តាខេត្តចំនួន ២៥ នៅកម្ពុជា ក្រោមកិច្ចសហប្រតិបត្តិការជាមួយនឹងក្រុមហ៊ុន ខេមបូឌាន ដេរីវ៉េទីវ អ៊ិចឆេង និងគណៈកម្មការមូលបត្រកម្ពុជា រួមនិងសាលារាជធានី-ខេត្តក្រុងនានា។ ដំណើរ Roadshow នេះត្រូវបានធ្វើឡើងស្ទើរគ្រប់ដែនដីទាំងអស់ក្នុងព្រះរាជាណាចក្រកម្ពុជា ក្នុងគោលបំណងផ្សព្វផ្សាយចំណេះដឹង និងបទពិសោធន៍នៃទីផ្សារជួញដូរឧបករណ៍និស្សន្ទនេះទៅកាន់សាធារណៈជននៅគ្រប់ទីកន្លែង។
លោកជំទាវ ឆាយ លក្ខិណា អគ្គនាយិកានៃក្រុមហ៊ុន ខេមបូឌាន ដេរីវ៉េទីវ អ៊ិចឆេង បានថ្លែងសុន្ទរកថាស្វាគមន៍ និងសម្តែងនូវអំណរគុណយ៉ាងជ្រាលជ្រៅដល់ភ្ញៀវកិត្តិយសទាំងអស់នៅរាត្រីនោះ។ វត្តមានរបស់ភ្ញៀវកិត្តិយសទាំងអស់ ជាមហាកិត្តិយសដ៏ថ្លៃថ្លាសម្រាប់យើងខ្ញុំ។ ពិធីជប់លៀងនេះត្រូវបានធ្វើឡើងក្រោមប្រធានបទ “Green Oasis” ដែលជានិមិត្តរូបបញ្ជាក់ថាយើងមិនត្រឹមតែយកចិត្តទុកដាក់ចំពោះជោគជ័យរបស់ខ្លួនប៉ុណ្ណោះទេ តែយើងក៏ប្តេជ្ញាបង្កើតបរិយាកាសស្រស់ស្អាតនិងបៃតងមួយផងដែរ។ ខ្ញុំជឿជាក់ថា រាត្រីនេះនឹងក្លាយជារាត្រីដែលមិនអាចបំភ្លេចសម្រាប់យើងគ្រប់គ្នា សូមភ្ញៀវកិត្តិយសទាំងអស់ទទួលបាននូវភាពសប្បាយរីករាយជាមួយយើងទាំងអស់គ្នា។
គណៈគ្រប់គ្រងរបស់ក្រុមហ៊ុនបានពិនិត្យមើលការអនុវត្តន៍របស់ខ្លួននៅឆ្នាំនេះ ដោយបញ្ជាក់ថា ភាពជោគជ័យរបស់ក្រុមហ៊ុនសព្វថ្ងៃនេះកើតចេញពីការគាំទ្ររបស់មិត្តៗទាំងអស់។ ទីផ្សារជួញដូរឧបករណ៍និស្សន្ទនៅកម្ពុជាកំពុងមានការអភិវឌ្ឍជារៀងរាល់ឆ្នាំ និងដោយការប្រកាន់ខ្ជាប់នូវបេសកកម្មផ្សព្វផ្សាយចំណេះដឹង និងបទពិសោធន៍ក្នុងវិស័យជួញដូរឧបករណ៍និស្សន្ទទៅកាន់ប្រជាជនកម្ពុជា ក្រុមហ៊ុនហ្គោលវែលប្តេជ្ញាចិត្តផ្តល់ការអប់រំ និងការណែនាំដែលពាក់ព័ន្ធ ជូនដល់ប្រជាជនក្នុងតំបន់ក្នុងវិធីសាស្ត្រមួយប្រកបដោយភាពត្រឹមត្រូវ ហើយបេសកកម្មនេះត្រូវបានសម្រេចជាមូលដ្ឋានហើយ។ ជាមួយគ្នានេះផងដែរ គណៈគ្រប់គ្រងបានសង្កត់ធ្ងន់ថា ក្នុងនាមជាក្រុមហ៊ុនឈានមុខគេក្នុងវិស័យជួញដូរឧបករណ៍និស្សន្ទ និងជាទូតក្នុងការលើកកម្ពស់និងផ្សព្វផ្សាយវិស័យជួញដូរឧបករណ៍និស្សន្ទជាលក្ខណៈសកលលោកនោះ ក្រុមហ៊ុនហ្គោលវែលមានកិត្តិយសចូលរួមចំណែកក្នុងការអភិវឌ្ឍរបស់ប្រទេសកម្ពុជា។
លើសពីនេះទៀត ពិធីជប់លៀងនេះក៏បានរៀបចំផងដែរនូវការសម្តែង និងការកំសាន្តដ៏សំបូរបែប។ ពិធីជប់លៀងនេះត្រូវបានបើកកម្មវិធីក្រោមរបាំប្រពៃណីកម្ពុជាដ៏ស្រស់ស្អាត។ កញ្ញា សុគន្ធ និសា ដែលជាតារាចម្រៀងល្បីមួយរូបប្រចាំកម្ពុជា បាននាំមកនូវការសម្តែងដ៏អស្ចារ្យដល់ភ្ញៀវទាំងអស់ ដែលធ្វើឲ្យកម្មវិធីទាំងមូលមានបរិយាកាសរ៉ូមែនទិក និងប្រកបដោយភាពផ្អែមល្ហែម។ បន្ទាប់ពីនេះ គណៈគ្រប់គ្រងក៏បានចាប់ផ្តើមការរាំ ដែលញ៉ាំងឲ្យភ្ញៀវកិត្តិយសទាំងអស់ឡើងរាំជាមួយគ្នាយ៉ាងសប្បាយរីករាយ។
អបអរសាទរឆ្នាំថ្មី យុគសម័យថ្មី។ ពិធីជប់លៀងដ៏អធិកអធមនេះ គឺជាការសង្ខេបសម្រាប់ឆ្នាំមុន និងជាការរំពឹងទុកសម្រាប់ឆ្នាំខាងមុខនេះ។ ក្រុមហ៊ុនហ្គោលវែលនឹងបន្តដំណើររបស់ខ្លួននៅឆ្នាំ ២០២០ ដោយមានបេសកកម្មជួយជម្រុញការអភិវឌ្ឍរបស់ប្រទេសកម្ពុជា និងបង្កើតភាពរុងរឿងថ្មីក្នុងយុគសម័យថ្មី។